Ordes galardoado coa bandeira verde como concello sostible.

A partires de hoxe, no noso concello ondeará unha bandeira verde, como símbolo dunha xestión ambiental eficiente. A bandeira foi recollida en Madrid polo alcalde Manuel Regos. O premio non é para sempre, se o concello quere conservala, terá que seguir traballando. «O noso próximo obxectivo é acadar un maior aforro enerxético e adaptar a Axenda 21 ao noso concello» di Regos. Nos últimos doce meses, o Goberno de Ordes colocou ao redor de 1.100 colectores destinados á recollida selectiva de lixo, que o ano pasado recolleron máis de 5.000 toneladas de desperdicios. Ademais, púxose fin a 25 vertedoiros incontrolados, as marxes do río Mercurín foron saneadas e os veciños comezaron a xerar o seu propio compost grazas a unha campaña en colaboración con Sogama. Por último salientar que este galardón só foi obtido por 12 concellos de toda España este ano.

E agora digo eu... Como me sona isto a conto chino. Como dí o noso amigo "Camiñante" nun comentario anterior, todo parece feito para desviar a atención nun tema no que, na miña opinión, se seguen facendo cousas mal. Os camións de sogama seguen pasando polo centro da vila, o da limpeza do río Mercurín non é tal e como se dí, o compost dos residuos orgánicos lévase facendo nas aldeas desde que son aldeas (quen come as sobras das comidas? os cans; quen come as mondas das patacas? Os porcos; etc etc etc.), e no dos colectores... a min que me perdoen, pero coñezo casos de aldeas nas que para tirar papel ou vidro hai que ir en coche... e non me parece algo demasiado ecolóxico nin sostible nin nada. Eu non sei cal será a vosa opinión, a miña penso que quedou clara.


Un saúdo.